शेर्वी पर्ला कोन्छ्योककी लेन ल्यामु ख्याप्टाक कितुप लाका ति लो बङी गोमाला गो चुवु यिन। ति की थोक्ला शेर्वी ग्यातामला राङ कोन्छ्योककी सुङ बाइबल छिकग्युर तोङ्गुप ति खाक्छ्येवु वोतुप तप्की छिकग्युरकी लाका गो चुसुङ्। गलु लो बङीला कोन्छ्योकला तेपा रम्बु वोतुप कोन्छ्योककी लाका कितुप मीतिवा दि लाका कितुपला खोतिवी छासे रोकराम किटो क्यासुङ। तिवी नाङ्ने :
- लूका ज्यल्सट्रा (अस्ट्रेलिया 1967)
- केन गोर्डन (अमेरिका1967)
- बुखर्ड स्कटलेन्डर (जर्मनी 1971-1977)
- दाग ताङ आशा वेन्डेल (नर्वे 1978-1980)
क्षि लो १९९३ ला कोन्छ्योककी सुङ बाइबल ति शेर्वी ग्यातामला छिक्ग्युर तोङ्गुप लाका गो चुसिमा शेर्वी पर्ला शेर्वी छोक्पा (शेर्वा फेलोसिप) साङ गो चुसुङ। तोजो पेकी तुजेला कोन्छ्योककी थोक्ला लाका कितुप क्षिग्यापकी मीतिवी (मिसिनरी) शेर्वातिवाला ङाडेन बिन्नी मिरा ङा टुक ५/६ चोयीला जोम्नी छोक्पा ति गो चुसुङ्। तिवी नङ्ने कोरियानेमा फेपुप साङ योङ ली ताङ हेलेन ली साङ च्यिक यिन। तुक राङ क्यानी अमेरिकाकी डेविड स्मिथ ताङ कोरियाकी जोन बुन ली साङ मुलाराङ डिक्नी शेर्वी थोक्ला लाका क्यासुङ। क्षि लो १९९४ ला ग्याकार लुङ्बाने पास्टर तिमोथी दोर्जी शेर्पाला कोन्छ्योककी सुङ ख्याप्टाक कितुप ताङ लोप्ज्युङ तेरुपला रोराम क्यासुङ। खोकी शेर्वी थोक्ला लो ङा ५ सेक् लाका क्यासुङ। तोजो पेला मी बङीकी शेर्वी पर्ला दिन्डा-दिन्डाला छोक्पा गो छुसि सिनी नरी मोपोर क्यासुङ।
शेर्वी छोक्पाकी ग्युम्जे ति शेर्वी पर्ला शेर्वी ग्याताम नाङ्ला राङ कोन्छ्योककी सुङ ख्याप्टाक क्यानी मीतिवाला कोन्छ्योककी ग्येल्खापला टिनी वुङ्गुप यिन। ग्युम्जे ति यिन्सिनाङ ख्याप्टाक क्यासिमा शेर्वातिवा सिनाङ यम्बा मिरिककी मीतिवा मङ जोम्सुङ। ति तप्की शेर्वी नाङ्ला शेर्वी पर्ला तिराङ लाका कितुप ति कले कोक्पु च्युङ्सुङ्। च्यिलेसिसि सिसिन कोन्छ्योककी यम्बा मिरिकी मीतिवाला साङ मोलम नङ्नी छोक्पाला तङ्गुप तप्की ङ्यिराङ तेरी ताम्ङे क्यानी रोङ्बी पास्टरला छोक्पा ति चेक तेतिन। तन्दा ति ती चर्चकी मीङ ति आर.टि.एन. चर्च सिवी। त्ये तन्दा तो मी मिरा तोङ्डा सुम ३००० चोयी सिनाङ ल्हाप्पा मीतिवा वे। तमा त्येकी छोक्पाला गोमा कितुप शेर्वातिवा साङ बङी वे।
क्षि लो १९९५ ला ङ्यिराङ शेर्वातिवा देतुप लुङ्बा श्यारखुम्बुला गोमाला कोन्छ्योककी सुङ ख्याप्टाक कितुपला गलुप यिन। ति ती तेरी सिनाङ गोमाला कोन्छ्योककी सुङ ख्याप्टाक क्यावु ति यिन। तमा त्येकी शेर्वातिवी ख्रीष्टला ङोशे थुप्सी सिनी त्ये ख्याप्टाक क्यावु यिन। त्येमी चेयी तिङ्ला ङ्यिराकोन्छ्योककी लाका कितुप शेर्वातिवा त्ये तङ्सी नाङ शेर्वातिवी कोन्छ्योकला तेपा माक्यानी यम्बा गिपातिवी के कोन्छ्योकला तेपा क्यानी ङ्यिमी टेङ्मा छासे फेलिन गाल। तन्दा ति त्ये चर्च ङ्यि गो चुनी वे।तिवी शेर्वी ग्यातामला मिन्दाला रोङ्बी ग्यातामला छोक्पा कियी वे।
क्षि लो २००१ ला येशूला ङोशेनी तेपा कितुप तेरी शेर्वातिवा डिक्नी यम्बुरकी बौद्द महाँकलला शेर्वी छोक्पा ति गो चुसुङ। कोन्छ्योककी ङ्यिरे क्यावु मोपोरला लेन ग्यापुप तप्की कोन्छ्योकला तेपा कितुप शेर्वाताव फेलिन-फेलिन गाल। तिवा ति अङ्डाला तिराङ मिन्दाला तेपी मिजीला साङ फरिन-फरिन गाल।कोन्छ्योकला तेपा कितुप शेर्वातिवा ङ्यिमे टेङ् फलिन गलुप तप्की शेर्वी नाङ्ला राङ दिन्डा-दिन्डा छोक्पा किगोकिवी सिनी केवुल क्यासुङ। च्यिलेसिसिन ति गोमाला लाला थेङ्मा ङ्यि तिराङ शेर्वी छोक्पा क्यानी वे। ति तप्की ङ्यिराङ तेरी डिक्नी मोपोर क्यानी क्षि लो २००७ ला शेर्वा चर्च सिनी गो चुसुङ। तोजो पेला ति छोक्पा जोनी छोक्पी ताम्ङे क्यानी कोन्छ्योककी लाका कितुपला छिरिङ शेर्पाला पास्टरकी लाका ति च्यक तेसुङ। तमा खोकी क्षि लो २०११ ला खोकी पास्टरकी लाका क्युरनी ज्याक्सुङ। ति तिङ्ला पास्टर पेम्नुरी (पेम्बा) शेर्वाला छोक्पी केवुल क्यानी शेर्वा छोक्पी थोक्ला पास्टरकी तेरी लाका ति च्यक तेसुङ। तन्दासेक् खोकी राङ शेर्वा चर्चला पास्टरकी लाका कियी वे। तोजो तिराङ मिन तेरी छोक्पा गोमा कितुप ताङ पास्टर डिक्नी शेर्वीतिवी थोक्ला मोपोर ताङ ख्याप्टाककी लाका कियी वोतुप तप्की कोले-कोले क्यानी मीतिवा कोन्छ्योककी ग्येल्खापला वुङिन-वुङिन वे। तन्दा ति ङ्यिरे छोक्पाला तो मिरा ९० चोयी वे। तमा तिवी नाङ्ने ५०-६० सेक् तेपा कितुपतिवी मुला राङ जोम्नी कोन्छ्योकला सोवा देकुप ताङ शेर्वी नाङ्ला सोवा देकुप लाका कियी वे। क्यासिनाङ नेपालला तोङ्डा ङा ५००० सिनाङ मङ शेर्वा मीतिवी कोन्छ्योकला तेपा क्यानी वे। दि तोङ्डा ङा ५००० ति बुङ् ग्ये ८००००० की नाङ्ला चेयी राङ यिन्सिनाङ ङ्यिरे क्यावु मोपोरकी लेन यिन।
क्षि लो २०११ ला शेर्वा चर्चकी यम्बुर लुङ्बाला वोतुप तेरी शेर्वातिवा दासा चिक्ला जोम्बु लेरिम ज्याक्सुङ। तिती छासे डछ्येर्मु ताङ लम्सुला गाल। तिकी जोसा लेन्सिन मलक-मलक कोन्छ्योकला ङोशेवु मीतिवाला छासे ङाडेङ ङेसुङ। तमा ति लोला राङ कोन्छ्योकला तेपा कितुप शेर्वातिवा चिकी चिक्ला ङोशेवाला, चिकी चिक्ला रोराम कितुपला, चिकी चिक्ला दुक्पाल, कलेला, छेटाङ्ला ख्येलुप ठोला रोराम कितुप ताङ तेरी डिक्नी चुक क्यानी कोन्छ्योककी ग्येल्खाप ति शेर्वी पर्ला ख्याप्टाक कितुप सिनी नासाम तङसिमा, “यम्बुर शेर्वा ख्रीष्टियन छोक्पा” (नेपाल शेर्वा ईसाइ संघ) सिनी मिङ तानी श्युङकी लेखुङ्ला च्यिसुङ। तुक राङ क्यानी क्षि लो २०१३ ला साङ शेर्वा चर्चकी छोक्ने येलुङ यम्बुर लुङ्बाला वोतुप तेरी जोम्बुप लेरिम ज्याक्सुङ तिती छासे मोलम थोपुप ताङ चिकी चिक्ला ङाडेङ तेरुप चुङ्सुङ। तुक राङ क्यानी क्षि लो २०१४ साङ शेर्वा चर्चकी छोक्ने राङ डुप्सुङ। तुक राङ क्यानी क्षि लो २०१६ ला ताप्लेजुङ्ला वोतुप तेपा कितुप शेर्वातिवी पर्ला जोम्बुप लेरिम ति लम्सुला गाल। तन्दा शेर्वा चर्चकी छोक्नेसुर कोन्छ्योककी सुङ् ताङ कोन्छ्योककी ग्यल्खापकी कोर्ला ख्याप्टाक कितुप लाका कियी वे।
शेर्वा चर्चकी मावोबाकी मिग्युलतिवा
- शेर्वा चर्च ति तेरी शेर्वा मीतिवी येशू ख्रीष्टला ङोसेनी तिवा साङ कोन्छ्योककी ग्यल्खापला वुङ् थुप्सि सिनी शेर्वा चर्च गो चुवु यिन।
- खाङरी खाकी नुम्बुप नाङश्यिङ क्यानि खाङरी लुङ्बाला देतुप मितिवि लुङ्बा साङ कोन्छ्योककी सुङकी क्येङ्श्यित सिरुप ति शेर्वा चर्चकी मावुबाकि मिग्युल (दर्शन) यिन।
- कोन्छ्योककी सुङ् शेर्वातिवी पर्ला तिराङ मिन्दाला तेरी फेरिगतिवी पर्ला ताङ ति ज्युक्ला मिरिक यम्बातिवी, ग्यल्खाप यम्बातिवी पर्ला ख्याप्टाक क्यितुप मावुबाकी मिग्युल यिन।
- कोन्छ्योककी लाका कितुप मितिवा शेर्वा चर्चकि छोक्नेसुर मावुबाला शेर्वी पर्ला यम्बा लुङ्बा तेरीला तिराङ मिन्दाला थकरिङ्बुला तोङ्गुप थप्सि वे।
- जम्बुलिङ लुङ्बाला वोतुप येशूला तेपा कितुप मितिवा डिक्नि चिकि चिक्ला रोराम क्यानि, केवुल क्यानी तेरीकी नासाम, थप्सि ताङ डिक्नी कोन्छ्योककी थोक्ला लाका कितुपला गोमा कितुप मावुबाकि मिग्युल वे।
- शेर्वा चर्चकि मोपोर ताङ, मिग्युल ति तेरीकि कोन्छ्योककी सुङ थोनी लाका मराप्ने ग्युर्वा ङ्येनी लाका ल्यामु कितुप मीजाङ ल्यामु ज्येङ्गुप तुक राङ क्यानी चिकी चिक्ला ताङ्देन कितुप ताङ दाक्पी मुला वोतुप नाम्दोकनेसुर थरुप ताङ सताङ, थुङ्दाङ, देताङ, लप्ताङ, नासाम तोङ्दाङ किताङ नालु ति ग्युर्वा ताङ्नी मीमङतिवा यर्गे डोसित सिरुप नासाम यिन।
- कोन्छ्योकला तेपा कितुप तेरि शेर्वातिवा कोन्छ्योककी सुङने चिकी चिक्ला येन्देन तेरुप खामु डोशि सिरूप नासाम यिन।
*दुकै दि सिनाङ यम्बा टिवातिवा वोसिङ ङिरा खापार आङ्किला अरा-उरा सिथुप्किवी। तमा मला बिन्दुप जि-मेलला टिवा, टोङ्गुतिवा तङ सुङ गोवु ताम्ङ्येतिवा वोसिङ ज्योकरोनाङ सिनी गोङ्बा श्युक्यीयीन ।
थुच्यी क्षे !
